ÍSLANDSDEILD
ICOM
Íslandsdeild ICOM var stofnuð árið 1985 með það að markmiði að efla faglegt safnastarf á Íslandi.
Faglegt starf í þágu safna
og samfélags
ICOM stendur fyrir International Council of Museums eða Alþjóðaráð safna. Það er samstarfsvettvangur safna og fagfólks safna, sem vinnur að því að varðveita, viðhalda og miðla til alþjóðasamfélagsins náttúru- og menningararfleið heimsins, huglægri sem hlutlægri, í samtíð sem framtíð. ICOM eru frjáls félagasamtök sem hafa komið á fót faglegum viðmiðum og siðareglum fyrir safnastarfsemi, stuðlað að þjálfun og þekkingarsköpun, tekið á málefnum og aukið menningarvitund almennings í gegnum alþjóðlegt tengslanet og samstarf.
Íslandsdeild ICOM var stofnuð árið 1985 með það að markmiði að efla faglegt safnastarf á Íslandi og auka samskipti fagfólks safna hér á landi við starfsfélaga víða um heim. Þáttur í þeirri viðleitni er íslensk útgáfa siðareglna ICOM, auk kynningar og fræðslu um siðareglurnar og önnur fagleg málefni safna. Fulltrúar stjórnar tala meðal annars máli landsdeildarinnar á árlegum aðalfundi samtakanna í París, eiga sæti í ráðgjafarráðinu og taka þátt í starfi svæðisbandalaganna ICOM Nord og ICOM Europe.
Fréttir
FARSÆLT SAMSTARF
Íslandsdeild ICOM á í gjöfulu og farsælu samstarfi við ýmsar aðrar stofnanir á safnasviðinu hérlendis. Sameiginlegt markmið þessara hópa er að styðja íslensk söfn með því að gangast fyrir faglegum viðmiðum og vinnubrögðum.
FÍSOS
Félag íslenskra safna og safnafólks var stofnað árið 1981 í þeim tilgangi að efla samstarf milli safna og fagfólks þeirra, fjalla um safnamál, auka þekkingu og fræðslu á söfnum og safnstörfum og annast samskipti við fagaðila og hliðstæð samtök erlendis.
Safnaráð
Safnaráð er stjórnsýslunefnd sem starfar eftir safnalögum en meginhlutverk ráðsins er að hafa eftirlit með safnastarfsemi í landinu, vinna að stefnumörkun um safnastarf, fjalla um viðurkenningar safna og veita umsagnir um styrkumsóknir í safnasjóð.
Blái skjöldurinn
Markmið alþjóðasamtaka Bláa skjaldarins er að vernda menningarverðmæti þegar hættuástand skapast vegna náttúruhamfara og átaka, meðal annars með áætlunum og viðbrögðum, þegar vá steðjar að, og stuðningi þegar hættuástandi lýkur.
SAFNASTARF Í SVIÐSLJÓSINU
Alþjóðlegi safnadagurinn
Frá árinu 1977 hefur Alþjóðlegi safnadagurinn verið haldinn að frumkvæði ICOM þann 18. maí ár hvert. Markmið dagsins er að vekja athygli á hlutverki safna í samfélaginu og velur ICOM árlega sérstakt þema sem söfn um allan heim taka mið af. Íslandsdeild ICOM annast kynningu og framkvæmd dagsins hér á landi í samstarfi við FÍSOS og hvetur söfn til þátttöku með fjölbreyttri dagskrá.
Íslensku safnaverðlaunin
Síðan 2000 hafa Íslensku safnaverðlaunin verið veitt fyrir framúrskarandi starf á sviði safna og menningararfs. Verðlaununum, sem eru veitt annað hvert ár, er einkum ætlað að vekja athygli á því sem vel er gert í íslensku safnastarfi og þeim verkefnum sem stuðla að þróun fagsins. Íslandsdeild ICOM stendur að verðlaununum ásamt FÍSOS. Forseti Íslands afhendir verðlaunin að jafnaði við hátíðlega athöfn á Alþjóðlega safnadaginn.