ÍSLANDSDEILD
ICOM

Íslandsdeild ICOM var stofnuð árið 1985 með það að markmiði að efla faglegt safnastarf á Íslandi.

Taktu þátt

Faglegt starf í þágu safna
og samfélags

ICOM stendur fyrir International Council of Museums eða Alþjóðaráð safna. Það er samstarfsvettvangur safna og fagfólks safna, sem vinnur að því að varðveita, viðhalda og miðla til alþjóðasamfélagsins náttúru- og menningararfleið heimsins, huglægri sem hlutlægri, í samtíð sem framtíð. ICOM eru frjáls félagasamtök sem hafa komið á fót faglegum viðmiðum og siðareglum fyrir safnastarfsemi, stuðlað að þjálfun og þekkingarsköpun, tekið á málefnum og aukið menningarvitund almennings í gegnum alþjóðlegt tengslanet og samstarf.

Íslandsdeild ICOM var stofnuð árið 1985 með það að markmiði að efla faglegt safnastarf á Íslandi og auka samskipti fagfólks safna hér á landi við starfsfélaga víða um heim. Þáttur í þeirri viðleitni er útgáfa siðareglna ICOM á íslensku, auk námskeiða sem Íslandsdeildin býður upp á til að kynna siðareglurnar fyrir félögum. Fulltrúar stjórnar tala máli landsdeildarinnar á árlegum aðalfundi samtakanna í París, eiga sæti í ráðgjafarráðinu og taka þátt í starfi svæðisbandalaganna ICOM Nord og ICOM Europe.

Fréttir

Endurskoðun siðareglna ICOM: fyrirlestur og umræður með Dr. Sally Yerkovich

Íslandsdeild ICOM býður félögum, safnafólki, fræðamönnum og hagsmunaaðilum til sérstaks fundar með Dr. Sally Yerkovich, sem leitt hefur endurskoðun siðareglna ICOM fyrir söfn undanfarin ár. Fundurinn fer fram í húsakynnum safnaráðs fimmtudaginn 5. mars kl. 10:00 til 11:30, Austurstræti 5, 4. hæð. Hólmar Hólm, formaður Íslandsdeildar ICOM, setur fundinn og…
Lesa meira

Íslensku safnaverðlaunin 2026 – óskað er eftir ábendingum

Óskað er eftir ábendingum frá almenningi, stofnunum og félagasamtökum um safn eða einstök verkefni á starfssviði safna sem þykja til eftirbreytni og íslensku safnastarfi til framdráttar. Söfnum er jafnframt heimilt að senda inn kynningar á eigin verkefnum. Til greina koma sýningar, útgáfur og annað er snýr að þjónustu við safngesti…
Lesa meira

Þjóð gegn þjóðarmorði

Íslandsdeild ICOM er meðal þeirra stofnana og samtaka sem styðja við fjöldafundinn Þjóð gegn þjóðarmorði. Við stöndum með palestínsku þjóðinni í baráttu hennar fyrir eigin lífi og öryggi og krefjumst þess að íslensk ríkisstjórn grípi til raunverulegra aðgerða til að sýna afstöðu sína gegn þjóðarmorði og stríðsglæpum Ísraelsríkis.
Lesa meira

FARSÆLT SAMSTARF

Íslandsdeild ICOM á í gjöfulu og farsælu samstarfi við ýmsar aðrar stofnanir á safnasviðinu hérlendis. Sameiginlegt markmið þessara hópa er að auka veg og vanda íslenskra safna með því að gangast fyrir faglegum viðmiðum og vinnubrögðum.

FÍSOS

Félag íslenskra safna og safnafólks var stofnað árið 1981 í þeim tilgangi að efla samstarf milli safna og fagfólks þeirra, fjalla um safnamál, auka þekkingu og fræðslu á söfnum og safnstörfum og annast samskipti við fagaðila og hliðstæð samtök erlendis.

Safnaráð

Safnaráð er stjórnsýslunefnd sem starfar eftir safnalögum en meginhlutverk ráðsins er að hafa eftirlit með safnastarfsemi í landinu, vinna að stefnumörkun um safnastarf, fjalla um viðurkenningar safna og veita umsagnir um styrkumsóknir í safnasjóð.

Blái skjöldurinn

Markmið alþjóðasamtaka Bláa skjaldarins er að vernda menningarverðmæti þegar hættuástand skapast vegna náttúruhamfara og átaka, m.a. með áætlunum og viðbrögðum, þegar vá steðjar að, og stuðningi þegar hættuástandi lýkur.

Áhugaverð verkefni á vegum félagsins

Alþjóðlegi safnadagurinn

Dagurinn er haldinn hátíðlegur 18. maí ár hvert en Alþjóðaráð safna hefur staðið fyrir safnadeginum síðan 1977.

Íslensku safnaverðlaunin

Íslensku safnaverðlaunin eru veitt annað hvert ár í þeim tilgangi að vekja athygli á því sem vel er gert á íslenskum söfnum.